కాజీపేట రైల్వే యూనిట్‌కు బంపర్ ఆఫర్: 200 ‘ఇంటర్‌సిటీ’ రైళ్ల తయారీకి కేంద్రం గ్రీన్ సిగ్నల్!

• తెలంగాణకు కేంద్రం భారీ కానుక; ప్రధాని మోదీ, రైల్వే మంత్రి అశ్వినీ వైష్ణవ్‌కు కిషన్ రెడ్డి కృతజ్ఞతలు.
• రూపుమార్చుకోనున్న కాజీపేట.. రాబోయే ఐదేళ్లలో 200 అత్యాధునిక ఇంటర్‌సిటీ రైళ్ల తయారీే లక్ష్యం.
• గంటకు 130 కి.మీ వేగం.. ఆటోమేటిక్ డోర్లు, సేఫ్టీ కోచ్ డిజైన్‌తో పట్టాలెక్కనున్న సరికొత్త రైళ్లు.

తెలంగాణ పారిశ్రామిక ప్రగతిలో మరో చారిత్రాత్మక ఘట్టం ఆవిష్కృతమైంది. వరంగల్ జిల్లాలోని కాజీపేట రైల్వే మ్యానుఫ్యాక్చరింగ్ యూనిట్‌కు (Kazipet Railway Manufacturing Unit) ఏకంగా 200 అత్యాధునిక ఇంటర్‌సిటీ రైళ్ల తయారీ బాధ్యతను అప్పగిస్తూ కేంద్ర రైల్వే శాఖ సంచలన నిర్ణయం తీసుకుంది. తెలంగాణ అభివృద్ధికి మోదీ ప్రభుత్వం నిరంతర సహకారం అందిస్తోందనడానికి ఈ నిర్ణయమే నిదర్శనమని కేంద్ర బొగ్గు, గనుల శాఖ మంత్రి జి. కిషన్ రెడ్డి హర్షం వ్యక్తం చేశారు.

ఈ మేరకు కేంద్ర రైల్వే శాఖ మంత్రి అశ్వినీ వైష్ణవ్ తీసుకున్న నిర్ణయాన్ని స్వాగతిస్తూ.. ప్రధాని నరేంద్ర మోదీకి, రైల్వే మంత్రికి కిషన్ రెడ్డి సోషల్ మీడియా వేదికగా ప్రత్యేక కృతజ్ఞతలు తెలియజేశారు.

సామాన్యులకు, విద్యార్థులకు వరం!

ఈ ప్రాజెక్టు ప్రాధాన్యతను వివరిస్తూ కేంద్ర మంత్రి కిషన్ రెడ్డి.. ఈ ఇంటర్‌సిటీ రైళ్లు పట్టణాలు, నగరాల మధ్య నిత్యం రాకపోకలు సాగించే సామాన్య ప్రజలకు ఒక వరంలా మారుతాయన్నారు. ప్రతి ట్రిప్‌లోనూ ఇవి ఎక్కువ స్టాప్‌లను కలిగి ఉంటాయని, దీనివల్ల సమీప నగరాల్లోని విద్యాసంస్థలకు వెళ్లే విద్యార్థులకు ఎంతో సౌకర్యవంతంగా ఉంటుందని తెలిపారు. కేవలం విద్యార్థులకే కాకుండా ఉపాధి, ఉద్యోగాలు, వైద్యం కోసం ప్రతిరోజూ ప్రయాణించే మధ్యతరగతి ప్రజలకు ఇవి లైఫ్ లైన్‌గా నిలుస్తాయన్నారు.

“కాజీపేట రైల్వే మ్యానుఫ్యాక్చరింగ్ యూనిట్ సామర్థ్యంపై నమ్మకంతో రైల్వే శాఖ మంత్రి అశ్వినీ వైష్ణవ్ గారు ఈ కీలక బాధ్యతలను అప్పగించారు. ఈ నిర్ణయంతో కాజీపేట ప్రాంతంలో స్థానికంగా వందలాది మంది యువతకు ఉపాధి అవకాశాలు లభించడమే కాకుండా, తెలంగాణ పారిశ్రామికంగా మరింత బలోపేతం అవుతుంది.” – జి. కిషన్ రెడ్డి, కేంద్ర మంత్రి

ఈ భారీ ప్రాజెక్టు కేటాయింపుతో కాజీపేట రైల్వే మ్యానుఫ్యాక్చరింగ్ యూనిట్ దేశంలోనే అత్యంత కీలకమైన రైల్వే హబ్‌గా మారబోతోందని రైల్వే నిపుణులు అభిప్రాయపడుతున్నారు.