రూ.7,597 కోట్లతో 4 వరుసల జాతీయ రహదారుల విస్తరణకు కేంద్ర క్యాబినెట్ గ్రీన్ సిగ్నల్!
National Highways Expansion : తెలంగాణలో రహదారుల అనుసంధాన్ని మరింత బలోపేతం చేస్తూ కేంద్ర ప్రభుత్వం మరో చారిత్రాత్మక నిర్ణయం తీసుకుంది. రాష్ట్రంలోని ఉత్తర జిల్లాల రవాణా ముఖచిత్రాన్ని పూర్తిగా మార్చే విధంగా రూ. 7,597.16 కోట్ల భారీ అంచనా వ్యయంతో 190.76 కిలోమీటర్ల జాతీయ రహదారుల విస్తరణ ప్రాజెక్టుకు ప్రధానమంత్రి నరేంద్ర మోదీ అధ్యక్షతన సమావేశమైన కేంద్ర ఆర్థిక వ్యవహారాల క్యాబినెట్ కమిటీ (CCEA) ఆమోదం తెలిపింది.
ఈ నిర్ణయం పట్ల కేంద్ర బొగ్గు, గనుల శాఖ మంత్రి జి. కిషన్ రెడ్డి తీవ్ర హర్షం వ్యక్తం చేశారు. తెలంగాణ ప్రగతికి, మౌలిక వసతుల కల్పనకు కేంద్రంలోని నరేంద్ర మోదీ ప్రభుత్వం కట్టుబడి ఉందనడానికి ఈ నిర్ణయమే మరొక నిదర్శనమని ఆయన స్పష్టం చేశారు. ఈ సందర్భంగా తెలంగాణ ప్రజల తరఫున ప్రధానమంత్రి నరేంద్ర మోదీకి ఆయన ప్రత్యేక ధన్యవాదాలు తెలియజేశారు.
National Highways Expansion | ఏ ఏ మార్గాల్లో రహదారుల విస్తరణ జరుగుతుంది?
ఈ ప్రాజెక్టులో భాగంగా తెలంగాణలోని రెండు ముఖ్యమైన జాతీయ రహదారులను 4 వరుసల (4-Lane) రోడ్లుగా అత్యాధునికంగా విస్తరించనున్నారు:
- ఆర్మూర్ – జగిత్యాల – మంచిర్యాల మార్గం (NH-63): నిజామాబాద్, జగిత్యాల, మంచిర్యాల జిల్లాలను అనుసంధానించే ఈ మార్గాన్ని హైబ్రిడ్ యాన్యుటీ మోడల్ (HAM) పద్ధతిలో విస్తరిస్తారు.
- జగిత్యాల – కరీంనగర్ మార్గం (NH-563): జగిత్యాల, కరీంనగర్ జిల్లాలను కలిపే ఈ మార్గాన్ని బిల్డ్-ఆపరేట్-ట్రాన్స్ఫర్ (BOT-Toll) పద్ధతిలో నిర్మిస్తారు.
ఈ ప్రాజెక్టుతో లభించే ప్రధాన ప్రయోజనాలు (Key Benefits)
| ప్రయోజనం | వివరాలు |
| ట్రాఫిక్ కష్టాలకు బ్రేక్ | అంకాపూర్, కోరుట్ల, ధర్మపురి, గంగాధర వంటి తీవ్ర రద్దీ ఉన్న ప్రాంతాల్లో కొత్తగా బైపాస్ రోడ్లను నిర్మిస్తారు. |
| గణనీయంగా తగ్గనున్న ప్రయాణ సమయం | ఆర్మూర్ – మంచిర్యాల మధ్య 1 గంట 30 నిమిషాలు, జగిత్యాల – కరీంనగర్ మధ్య దాదాపు 45 నిమిషాలు సమయం ఆదా అవుతుంది. |
| అత్యాధునిక సదుపాయాలు | గంటకు 100 కిలోమీటర్ల వేగంతో ప్రయాణించేలా ఓపెన్ టోలింగ్ సౌకర్యంతో ఈ రహదారులను తీర్చిదిద్దుతారు. |
| పర్యావరణానికి మేలు | ఇంధన వినియోగం తగ్గడం వల్ల పర్యావరణానికి హాని చేసే కార్బన్ ఉద్గారాలు నియంత్రణలోకి వస్తాయి. |
| భారీగా ఉపాధి అవకాశాలు | ఈ నిర్మాణ పనుల ద్వారా స్థానికంగా సుమారు 77 లక్షల రోజులకు సరిపడా పనిదినాల (Man-days) రూపంలో ఉపాధి లభిస్తుంది. |
‘పీఎం గతిశక్తి’తో పుణ్యక్షేత్రాలు, ఆర్థిక కేంద్రాల అనుసంధానం
కేంద్ర ప్రభుత్వ ప్రతిష్టాత్మక ‘పీఎం గతిశక్తి’ సూత్రాల ఆధారంగా రూపుదిద్దుకున్న ఈ రహదారులు రాష్ట్రంలోని పలు కీలక కేంద్రాలను ఒకదానితో ఒకటి అనుసంధానిస్తాయి:
- 5 ఆర్థిక కేంద్రాలు: వరంగల్, సిద్దిపేట SEZలు, నిజామాబాద్ మెగా ఫుడ్ పార్క్ వంటి వాటికి రవాణా సులువవుతుంది.
- 7 ప్రముఖ పుణ్యక్షేత్రాలు: వేములవాడ, కొండగట్టు, కాళేశ్వరం వంటి ప్రముఖ ఆధ్యాత్మిక క్షేత్రాలకు వెళ్లే భక్తులకు ప్రయాణ కష్టాలు తప్పుతాయి.
- 10 లాజిస్టిక్స్ కేంద్రాలు: వివిధ రైల్వే స్టేషన్లతో కూడిన లాజిస్టిక్స్ కేంద్రాలను అనుసంధానించడం వల్ల సరుకు రవాణా వేగవంతమై ప్రాంతీయ ఆర్థికాభివృద్ధికి ఎంతగానో దోహదపడుతుందని కేంద్రమంత్రి కిషన్ రెడ్డి పేర్కొన్నారు.
🇮🇳 జాతీయ ప్రయోజనాలే పరమావధిగా.. 🇮🇳
