food Adulteration Jiyaguda samosa unit raid | హైదరాబాద్ : నగరవాసుల ఇష్టమైన చిరుతిండి ‘సమోసా’ వెనుక ఉన్న చీకటి కోణాన్ని హైదరాబాద్ పోలీసులు బయటపెట్టారు. జియాగూడ ప్రాంతంలో అత్యంత అపరిశుభ్రమైన పరిస్థితుల్లో, ఎటువంటి అనుమతులు లేకుండా నడుస్తున్న ఒక భారీ అక్రమ ఆహార తయారీ యూనిట్పై టాస్క్ ఫోర్స్ అధికారులు మెరుపు దాడులు నిర్వహించారు.
కుళ్లిన గుడ్లు.. వాడిన నూనెలే ముడి పదార్థాలు!
విశ్వసనీయ సమాచారం మేరకు, కుల్సుంపుర పోలీసులతో కలిసి హైదరాబాద్ ఫుడ్ అడల్టరేషన్ సర్వైలెన్స్ టీమ్ (H-FAST) నిర్వహించిన ఈ దాడుల్లో దిగ్భ్రాంతికర విషయాలు వెలుగుచూశాయి. నిందితుడు అబ్దుల్ రషీద్ (73) ఎటువంటి FSSAI లైసెన్స్, ట్రేడ్ లైసెన్స్ లేదా ఫైర్ సేఫ్టీ క్లియరెన్స్ లేకుండా ఈ యూనిట్ను నడుపుతున్నాడు.
ఆపరేషన్ సమయంలో అధికారులు గుర్తించిన ప్రధాన ఉల్లంఘనలు:
- నాసిరకం పదార్థాలు (food adulteration): పాడైపోయిన, నిల్వ ఉన్న ఉడికించిన గుడ్లను సమోసా స్టఫింగ్ కోసం వాడుతున్నారు.
- క్యాన్సర్ కారక నూనె: ఒక్కసారి వాడిన వంట నూనెను పదేపదే మరిగిస్తూ ఆరోగ్యాన్ని పణంగా పెడుతున్నారు.
- అపరిశుభ్రత: తయారీ కేంద్రం మొత్తం దుర్వాసనతో, ఈగలతో అత్యంత అపరిశుభ్రంగా ఉంది.
An illegal food manufacturing unit engaged in the large-scale preparation of samosas under grossly unhygienic conditions was successfully busted by the Hyderabad Food Adulteration Surveillance Team (H-FAST) of the Task Force, in coordination with Kulsumpura Police, on 20.03.2026… pic.twitter.com/NnOHOyq56d
— Hyderabad City Police (@hydcitypolice) March 21, 2026
రూ. 5 లక్షల విలువైన నిల్వలు స్వాధీనం
ఈ దాడుల్లో సుమారు ₹5 లక్షల విలువైన కల్తీ ఆహార పదార్థాలను పోలీసులు సీజ్ చేశారు. స్వాధీనం చేసుకున్న వాటిలో భారీగా తయారు చేసిన సమోసాలు, క్వింటాళ్ల కొద్దీ మైదా, స్వీట్ కార్న్, తయారీకి ఉపయోగించే యంత్రాలు ఉన్నాయి. నిందితుడిని అరెస్టు చేసి, చట్టపరమైన చర్యలు ప్రారంభించినట్లు టాస్క్ ఫోర్స్ అధికారులు తెలిపారు.
పోలీసుల హెచ్చరిక
ఆహార కల్తీకి పాల్పడే వారిపై ఉక్కుపాదం మోపుతామని హైదరాబాద్ నగర పోలీసులు హెచ్చరించారు. ప్రజారోగ్యంతో ఆటలాడే ఇటువంటి చట్టవిరుద్ధ కార్యకలాపాలు ఎక్కడ గమనించినా వెంటనే పోలీసులకు సమాచారం అందించాలని కోరారు. ముఖ్యంగా బయట దొరికే చిరుతిళ్లు కొనేటప్పుడు తగు జాగ్రత్తలు పాటించాలని సూచించారు.
🇮🇳 జాతీయ ప్రయోజనాలే పరమావధిగా.. 🇮🇳
