న్యూఢిల్లీ : భారత రైల్వే చరిత్రలో మరో అద్భుత అధ్యాయం మొదలైంది. రైలు ప్రయాణికులు ఎంతో ఆసక్తిగా ఎదురుచూస్తున్న మొట్టమొదటి ‘వందే భారత్ స్లీపర్’ రైలు (Vande Bharat Sleeper Train)ను ప్రధానమంత్రి నరేంద్ర మోదీ ఈరోజు (జనవరి 17) ప్రారంభించారు. పశ్చిమ బెంగాల్లోని మాల్డా టౌన్ రైల్వే స్టేషన్ నుండి జెండా ఊపి ఈ అత్యాధునిక రైలును ఆయన జాతికి అంకితం చేశారు.
ఈ చారిత్రాత్మక రైలు కోల్కతాలోని హౌరా నుంచి అస్సాంలోని గౌహతి (కామాఖ్య) మధ్య నడుస్తుంది. తూర్పు, ఈశాన్య భారతదేశాన్ని కలిపే ఈ రైలు ద్వారా దాదాపు 960 కిలోమీటర్ల దూరాన్ని కేవలం 14 గంటల్లోనే చేరుకోవచ్చు. సాధారణ రైళ్లతో పోలిస్తే ఇది ప్రయాణ సమయాన్ని 2.5 నుండి 3 గంటల వరకు తగ్గిస్తుంది.
తొలి వందే భారత్ స్లీపర్ రైలును జెండా ఊపి ప్రారంభించిన ప్రధాని మోదీ
మాల్డాలో జరిగిన ఒక ప్రత్యేక కార్యక్రమంలో, ప్రధానమంత్రి మోదీ ఈ అత్యాధునిక రైలును ఒక బటన్ నొక్కి, ఆపై జెండా ఊపి ప్రారంభించారు. ప్రారంభోత్సవానికి గుర్తుగా, ఒక ప్రత్యేక రైలు (రైలు నంబర్ 02075) మాల్డా టౌన్ నుంచి కామాఖ్యకు బయలుదేరింది, మరొక రైలు (రైలు నంబర్ 02076) కామాఖ్య నుండి హౌరాకు బయలుదేరింది. రెగ్యులర్ ప్యాసింజర్ సర్వీస్ రేపు, జనవరి 18న ప్రారంభమవుతుంది.
హౌరా నుండి కామాఖ్యాకు 14 గంటల్లో చేరుకోవచ్చు
భారతదేశపు మొట్టమొదటి వందే భారత్ స్లీపర్ రైలును జెండా ఊపి ప్రారంభించే ముందు ప్రధానమంత్రి నరేంద్ర మోదీ దానిలోని విద్యార్థులు, లోకో పైలట్లతో సంభాషించారు. దేశంలోని మొట్టమొదటి వందే భారత్ స్లీపర్ రైలులో 16 కోచ్లు ఉన్నాయి. ఈ రైలు హౌరా, కామాఖ్య మధ్య దాదాపు 958-968 కిలోమీటర్ల దూరాన్ని కేవలం 14 గంటల్లోనే కవర్ చేస్తుంది, ఇది ప్రస్తుత రైళ్ల కంటే దాదాపు 2.5-3 గంటలు తక్కువ.
ఈ సందర్భంగా ప్రధానమంత్రి నరేంద్ర మోదీ మాట్లాడుతూ, “కొద్దిసేపటి క్రితం పశ్చిమ బెంగాల్కు సంబంధించిన అనేక అభివృద్ధి ప్రాజెక్టులు ప్రారంభించబడ్డాయి. పశ్చిమ బెంగాల్ కొత్త రైలు సేవలను పొందింది. ఈ ప్రాజెక్టులు ఇక్కడి ప్రజలకు ప్రయాణాన్ని సులభతరం చేస్తాయి మరియు వ్యాపారాన్ని కూడా సులభతరం చేస్తాయి. నేటి నుండి భారతదేశంలో వందే భారత్ స్లీపర్ రైలు ప్రారంభించబడుతోంది. ఈ కొత్త వందే భారత్ స్లీపర్ రైలు ప్రయాణాన్ని మరింత సౌకర్యవంతంగా చేస్తుంది.”
టికెట్ ధరలు (Fare Details):
వందే భారత్ స్లీపర్ ఛార్జీలు రాజధాని ఎక్స్ప్రెస్ కంటే కొంచెం ఎక్కువగా, ప్రీమియం విభాగంలో ఉంటాయి. కనీస ఛార్జీ 400 కి.మీ. దూరానికి లెక్కించబడుతుంది.
1AC: కిలోమీటరుకు రూ. 3.80 (హౌరా-గౌహతి సుమారు రూ. 3,600) (గమనిక: GST అదనం)
3AC: కిలోమీటరుకు రూ. 2.40 (హౌరా-గౌహతి సుమారు రూ. 2,300)
2AC: కిలోమీటరుకు రూ. 3.10 (హౌరా-గౌహతి సుమారు రూ. 3,000)
